تجربتي مع اليوتيوب وأدسنس

تجربتي مع الأدسنس واليوتيوب, تجربـة فاشلة جداً 
على قد ما أفتكر منـها هذكره لإنها من فترة.

أولاً إبعد عن الحقوق الملكيـة ثم إبعد الحقوق الملكيـة بلاش تغرك المكاسب السريعة والأرباح الهائلة... لو هتعدي YOUTUBE AUTOMATIC COPYRIGHT DETECTION, هتلاقي على الأخر الشهر كدة يوم 28, أو 29 واحدة MANUAL COPYRIGHT, ليـه في أخر الشهر عشان يلم الأرباح اللي جنيتـها يامعلم :) وعشان متتحولش الأرباح ليك في أدسنس.

طيب أنا الشيطان لعب في دماغي ونزلت حاجـة ليها حقوق ملكية مثلاً فيلم وثائقي من NATIONAL GEOGRAPHIC ومفيش يومين تلقيت إنذار بسبب مخالفة حقوق الطبع والنشر.. ينفع أعدي منـها ؟! في إحتمال تعدي , راسل اليوتيوب وقولهم إنك بتنزل الحاجات دي عشان التعليم وتوعيـة المجتمعات ونشر الثقافة وإن هدفك ليس الرباح المادي وإن غايتك الأساسية زيادة وعي الفرد وبالتالي هتشكل وعي مجتمع يساعد البشرية على النهوض والتقدم أشياء من هذا القبيل " حدث بالفعل معي".

لاقيت القناة بتاعتي فاشلة ومحدش راضي يعبرها, وفي لحظة يأس نزلت حاجة ليـها علاقة بقنوات MBC وتلقيت إنذار بعدها بنصف ساعة عشان هما بتوع الـ MBC قاعدين مستنيين لأي حد :) .. في إحتمال بنسبة 10% تعدي حصل معايا في حلقة من حلقات "مسرح مصر" راسلت اليوتيوب وقولتلهم إني الهدف من نشر هذا الفيديو هو الترفيه ورسم الإبتسامة على وجوه المصريين ومنع إحتكار مثل هذه الإعمال لإني شخص لا أحبذ الإحتكار. واليوتيوب بالفعل صدق..طيب أنا أحذف الحلقة لا طبعاً محذفتش... إفتكرت إن اليوتيوب صدق كلامي خلاص كدة مهما يحصل MANUAL CLAIMING..اليوتيوب مش هيصدق تاني أصلاً...مفيش يومين تلقيت مخالفة تانيـة واليوتيوب مصدقش كلامي مرة أخرى..فلو جت معاك إحذف الفيديو على طول.

تلقيت 3 COPYRIGHT STRIKES وميزة الأرباح MONETIZATION غير مفعلة وعدى مدة الثلاثة شهور المخالفات إتشالت ولكن خاصية الربح MONETIZATION غير مفعلة.. إعمل سكرين شوت لـ STATUS AND FEATURES للقناة بتاعتك وبعدين إبعتها مع لينك القناة مع شرح مشكلتك لليوتيوب هتلاقيهم خلال 48 ساعة على الأكثر مشكلتك إتحلت

طيب هو أنا ممكن أكسب كويس من اليوتيوب أحقق أرباح كويسة جداً, أه ممكن :) لو المحتوى مش مسروق والمشاهدين من دولة زي فنلندا أو السويد أو أيرلندا أو دول من هذا القبيل لإن قيمة الإعلانات عندهم عاليـة, أحياناً 1,000 مشاهدة بتوصل لـ 5 دولار ..طيب في أعلى من كدة ....في أعلى من كدة لو نزلت حاجة وتم مشاهدة الفيديو الخاص بك من YOUTUBE RED ياسيدي ..1,000 مشاهدة على ما أتذكر 7.5 او 8 دولارات, لو من السعوديـة أحيانا 1,000 بتوصل لـ 1,5 دولار, وتقريباً الإمارات زي السعوديـة, لكن لو من مصر 20,000 مشاهدة 0.5 دولار
 :) :) :)

طيب هو مهم النسبة والتناسب بمعنى أنا نزلت حاجة 90 دقيقـة والناس بتدخل بتتفرج بس على 15 دقيقة أنا ممكن أحقق مكسب ولا اليوتيوب هيعتبر إن المحتوى غير مرغوب فيـه, ولا في الدماغ خالص.. أنا نزلت فيلم "لف دوران لـ أحمد حلمي" وحقق تقريباً 700 ألف مشاهدة أو يزيد وكانت المشاهدة بنفس النسبة وحققت أرباح تقريباً 930 دولار ..أنا مخدتش حاجة من 930 دولار لإن اليوتيوب فـش$%#$ الفيديو :)


:)

طيب الفيديو إتحذف وخاصية الربح وتحقيق المال مازالت شغالة الفلوس اللي كسبتها وموجودة في التقاريرات اليوميـة دي هاخدها ..لا طبعاً ولا هتاخد حاجة بالسلامة كدة. ولا تصدق اللي يقولك إنتظر 90 يوم ولا 90 سنة.

طيب هو إعلانات GOOGLE ADWORDS مفيدة , مفيدة جداً لو إنت عندك فيديو قوي ومفيـد واثق إن هيحقق مشاهدة, إعمله إعلان بس يفضل يكون بعد فترة من إنشاء القناة بحيث يكون بقى في عدد هائل من الفيديوهات موجودة, اللي هتكسبه إن المشاهدين هتدخل هتعجب بالفيديو فهتلاقي ناس منهم تعمللك سبسكرايب وهتلاقي البعض يدخل يشاهد ويتصفح فيديوهاتك, مش شرط تعمل إعلانات لحد ما يوصل مليون مشاهدة ممكن تعمل لحد ما يوصل مثلاُ 50,000 مشاهدة حصل معايا لما نزلت فيلم "أبو شنب" لياسمين عبدالعزيز كان في ناس نزلت الفيلم قبلي, وعملت إعلان على جوجل GOOGLE ADWORDS وماشاء الله مفيش يومين ولاقيت الفيديو وصل 20,000 مشاهدة وبعدين وصل 50,000 مشاهدة 😂 ومفيش شهر لاقيت الفيديـو وصل لـفوق 1,100,000 ..بس مخدتش حاجة بردو لإن وقتـها نزلت حلقة من حلقات مسرح مصر وتلقيت إنذار بمخالفة حقوق الطبع والنشر وخاصية الربح توقفت فمخدتش من الفيديو دة إلا 13 دولار اللي كسبتهم أول يومين 😂 كان القناة إسمها 7MINUTE ARABIC MOVIES .

طيب أي بطاقة دفع إلكتروني أقدر أستخدمها في إني أعمل بيها إعلانات على Google AdWords... بطاقة Debit Card فقط لا Credit Card ولا Prepaid Card ينفعوا ...لازم Debit Card.

وصلت لمرحلة إنه تم حظرك من اليوتيوب خلاص مبقتاش عارف تدخل من الإيميل دة على اليوتيوب, إنت طيب فاكر إن المشكلة في اليوتيوب تروح تعمل حساب GMAIL جديد وتعمل قنوات على اليوتيوب وتربطه بالأدسنس القديم لإنه مفعل وتبدأ تكسب وبعدين تلاقي بردو تم حظرك من اليوتيوب وإنت معملتش حاجة أصلاً لسه على الأكونت ولا لسـه نزلت حاجة !! 😂 تجرب تاني حساب تاني من IP مختلف بردو نفس المشكلة ..المشكلة بقيت في أدسنس يابوب مبقاش ليـه قيمة. إرميـه بالنسبة لأدسنس هتلاقيه شغال ومفيش أي رسالة بتجيلك بأخطاء ولكن مش هتقدر تربطه بقنوات تاني.طيب استنى 6 شهور زي ما "بيقولوا" عشان الحظر يتفك ويتشال إستنى مليون سنة ..الحل إنك تحذف الأكونت لو حساب أدسنس مُفعل لإنك مش هتعرف تعمل حساب أدسنس بنفس الإسم إلا لو حذفت الحساب المُفعل.

القناة الرئيسية متعملش عليـها حاجة سيبها فاضية عشان لو إتعملها TERMINATION خلاص الحساب كدة بالسلامة مش هتعرف تدخل من خلاله اليوتيوب, يفضل يكون القناة فرعيـة عشان لو حصلها TERMINATION تفضل شغال بالأكونت عادي.. طيب إتعمل TERMINATION للقناة الرئيسية ومش عارف تدخل بالأكونت بتاعك هي مصير القنوات التانيـة اللي مفيهاش مخالفات, إحتمال اليوتيوب يعملها إنهاء وإحتمال لا..بالنسبة للإحتمال لا ..طيب أنا ينفع استغلها وأحمل عليها فيديوهات اه عادي هتدخل على BRAND ACCOUNTS : وبعدين تختار القناة اللي لسه شغالة » دعوة مستخدمين جدد وتقوم بإضافة أكونتك الجديد.

طيب أنا عايز أستخدم فيديوهات وSources من اليوتيوب بدون ما يحصلي مشكلة, هو في فيديوهات بدون حقوق ملكية وبجودة عالية أه في فيديوهات لحد اللحظة اللي بكلمك دي فيها مالهاش حقوق ملكيـة قناة زي devinsupertramp : لينك عليها مجموعة فيديوهات مالهاش حل خطيرة ممتعة وبجودة خرافية 4K

وفي مئات الملايين من الفيديوهات مالهاش حقوق ملكيـة وبجودة عالية. بس خد بالك أحيانا أصحاب قناة Devinsupertramp بيستخدموا أغاني ليها حقوق ملكية.... طيب انا دلوقتي خايف أنزل حاجة ويطلع فيها مشكلة, إعمل أكونت وقناة على اليوتيوب وماتربطهاش بأي ادسنس ولزيادة الإطمئنان نزل EXTENSION الـ DotVPN هيغير الـ IP بتاعك وإرفع فيديوهاتك عليـها لو فيها مشكلة في حقوق الملكية هتعرف مفيش خلاص , إبدأ إرفعها على القناة الرئيسية.

على فكرة إنت ممكن تعمل محتوى قوي جداً ومتلاقيش حد بيعبرك عادي 😂 وممكن تلاقي واحد عامل هبل وعليه إقبال زيّ الفُل...معظم اللي ناجحين في اليوتيوب هتلاقيهم بيظهروا مباشرة, حتى لو هتتكلم في أي هبل.. وفي بعض القنوات ناجحة زي متع عقلك وهي عبارة عن فيديوهات وثائقية وبيتم التعليق عليـها فمفيش قاعدة..

#اللعنة
السؤال اللي مفروض يتسأل لي ...هو إنت ليه محتفظ بحساب الأدسنس طالما مفعل ومش هتعرف تستخدمه الأفضل إنك تحذفه عشان تعرف تعمل واحد؟!!!... في الحقيقة الأدسنس هو اللي محتفظ بيا.. أنا عملت أكونت تاني على جوجل وضفته على الأدسنس وبعد ما ربطت الأكونت الجديد بأدسنس خليته ADMINISTRATOR..والرئيسي جعلته STANDARD USER.. انا من عادتي إني بعمل باسوردات طويلة معقدة جداً يعني ممكن توصل لـ 50 حرف ومش بحتفظ بالباسوردات بأفضل حفظهـا... اللي حصل إني نسيت الأكونت الجديد والباسورد الجديد مأساة 😂😂 ومش فاكر حاجة عنه وعشان كدة الأدسنس مكمل معايا للأبد

بالتوفيق إن شاء الله ..وشوية حظ هتنجح في اليوتيوب.

لو إفتكرت حاجة تانية هبقى أكتبـها
حاجة أخيرة أرباحي الكلية في النهاية 31.52 دولار